انصار: ( د کب ۳ مه)، وروسته تر هغې، چې د اټومي انرژۍ نړیوالې ادارې په ایران کې د یورانیمو په غني کولو اندېښنه وښوده؛ تازه د دغه هېواد د اتومي پروګرام مشر د یادې ادارې مشر رافایل ګروسي ته بلنه ورکړې چې تهران ته ورشي
د ایراني رسنیو د دغه هېواد د اټومي ادارې د مشر محمد اسلامي له قوله ویلي، چې ګروسي ایران ته د سفر نیت څرګند کړی او ویلي یې دي، چې دا یې په اجنډا کې شامل دی.
ټاکل شوې، چې دا سفر د روان کال په می میاشت کې ترسره شي.
ګروسي ته دا بلنه په داسې حال کې ورکول کېږي، چې هغه تر دې وړاندې ویلي وو، چې د یورانیمو د نه غني کولو په اړه د دوی له غوښتنو سره سره، بیا هم ایران په پراخه کچه یورانیم غني کوي.
ویل کېږي، چې رافایل ګروسي به د ایران په اصفهان کې د اتومي انرژۍ په اړه جوړېدونکي نړیوال کنفرانس کې هم وینا وکړي.
د یادونې ده چې تهران د یورانیمو د غني کولو په اړه تل د اتومي انرژۍ نړیوالې ادارې تورونه بې اساسه بللي دي.
URL تعقيب: https://www.ansarpress.com/pashto/30250
